X (soziales Netzwerk)

X (bis 2023 Twitter) isch e sozial Netzwärch un e Dagbuech, wu mer zmeischt effetlig im Internet cha bschaue (Mikroblog). S cha wältwyt per Websyte, Mobildelifon, Desktopaawändig, Widget oder Webbrowser-Plug-in gfiert un aktualisiert wäre. Twitter isch im März 2006 dr Effetligkeit vorgstellt wore un het anne 2007 dr „South by Southwest Web Award“ in dr Kategoryy „Blogs“ gwunne.

Aagmäldeti Benutzer chenne eigeni Textnochrichte mit aafangs 140 Zeiche (syt em Novämber 2017 280) yygee un andere Benutzer schicke. Dr Rusgeber vu dr Nochricht stoht uf dr Websyte vum Dienscht mit ere Abbildig as elleinige Autor iber syym Inhalt. D Byytreg sin vilmol us dr Ich-Perspektive gschribe. S Mikro-Blog bildet e Ächtzyt-Medium, wu fir Autor un Läser eifach z handhaben isch un wu mer Aschpäkt vu syym eigene Läbe un Meinige zue spezifische Themene cha darstelle. Fir d Läser isch s au meglig Kommentar oder Diskussione zuen eme Byytrag z verfasse. Dodermit cha des Medium em Uusdusch vu Informationen, Gedanken un Erfahrige diene un au fir Kommunikation zwische dr Lyt. S Schryybe uf Twitter wird zmeischt „twittere“ (dt. „twittern“) gnännt.

D Byytreg uf Twitter wäre „Tweets“ (en. to tweet 'zwitschere') oder „Updates“ gnännt. S referänziert Widerhole vun eme Bytrag vun ere andere Person, go zem Byschpel e Mäldig, wu brässiert, im Netzwärch schnäll wyterverbreite, wird „ReTweet“ gnännt. S sozial Netzwärk beruet dodruf, ass mer d Nochrichte vu andere Benutzer cha abonniere. D Läser vun eme Autor, wu syni Byytreg abonniert hän, wäre „Follower“ (en. to follow sb. 'eberem nogoh') gnännt. D Byytreg vu dr Persone, wu mer noogoht, wäre in eme Logbuech dargstellt, ere abezues chronologisch sortierte Lischt vu Yytreg. Dr Absänder cha entscheide, eb er syy Nochrichte allne will z Verfiegig stelle oder dr Zuegang uf e Gruppe vu Frynd will bschränke.

Iber e Programmierschnittstell (API) stelle Komplementore di iber Twitter vereffetligte Nochrichte z Verfiegig, eso chenne d Updates uf verschidene Kanäl vu vil Dienscht abgruefe un vu dert uus au wider yygspyyst wäre. Em Benutzer stehn unter anderem Kommunikationsstrukture wie SMS (nur USA, Kanada un Indie^[4]) oder eifachi Yygabehilfe iber d Twitter-Homepage (RSS) oder Aawändigsprogramm z Verfiegig.

Dur Erwyterige leen sich zuesätzligi Informatione iber dr Absänder un d Empfängergruppe aazeige, wie zem Byschpel dr jewylig Standort uf em Chartedienscht Google Maps.

1. ↑ Kate Conger: So What Do We Call Twitter Now Anyway? In: nytimes.com. 3. August 2023, abgruefen am 3. Februar 2024 (änglisch). 
2. ↑ twitter.com: just setting up my twttr
3. ↑ Andrew Hutchinson: Twitter Adds 12 Million More Users, Posts Weaker Revenue Result Amid Pending Takeover by Elon Musk. In: socialmediatoday.com. 28. April 2022, abgruefen am 2. Juni 2022 (änglisch). 
4. ↑ Im Augschte 2008 het Twitter dr Versand vu SMS-Churznochrichte usserhalb vu dr USA, Kanada un Indie yygsellt. Pressemitteilig